გოგა ხაინდრავამ ტელეკომპანია ტვ ფორმულა ს სასამართლოში უჩივლა.
კინორეჟისორმა გოგა ხაინდრავამ განაცხადა, რომ ტელეკომპანია „ტვ ფორმულამ“ მის შესახებ კიდევ ერთი ცრუ და ცილისმწამებლური ინფორმაცია გაავრცელა. ხაინდრავას თქმით, ტელეკომპანია მას კრიმინალურ ქმედებებში მონაწილეობასა და ქრთამის აღებაში ადანაშაულებს. როგორც გოგა ხაინდრავამ აღნიშნა, მან აღნიშნულთან დაკავშირებით სარჩელი შეიტანა და ასევე დაუკავშირდება საქართველოს პროკურატურას, საქართველოს სახელმწიფო უსაფრთხოების სამსახურს და შინაგან საქმეთა სამინისტროს, რომ დაინტერესდეს ამ საკითხით და დაიწყოს გამოძიება. „შეგახსენებთ, რომ 2025 წლის 20 დეკემბერს შპს „ტყუილის ფორმულამ“ გაავრცელა აბსოლუტურად ცრუ ამბავი ჩემზე, ჩემს ოჯახზე და ჩემს საქმიანობაზე. ამ ამბავში არც ერთი მართალი სიტყვა არ ყოფილა. ეს იყო ჩემი ზიანის მიყენების მცდელობა საჯარო სივრცეში ჩემი აქტივობის გამო. ამასთან დაკავშირებით განვაცხადე, რომ შევიტანდი სარჩელს და მოვითხოვდი იმ ინფორმაციის უარყოფას, რომელიც შეიცავს მნიშვნელოვნად ცრუ ფაქტებს და მედიაში მოსარჩელის სახელის, პატივისა და ღირსების დისკრედიტაციას ახდენდა. ამის შემდეგ, ჩემი ღრმა დარწმუნებით, მოჰყვა დანაშაულებრივი ქმედება, რომელიც ჩადენილია 17 იანვარს იმავე შპს „ტყუილის ფორმულა“-ს შაბათის ეთერში. სახელმწიფო დანაშაულის ჩადენაში დამადანაშაულეს. ანუ, მძიმე დანაშაულის წინასწარ დაგეგმილ, კოორდინირებულ ჩადენაში, რომელიც გულისხმობს დანაშაულებრივ კავშირს სახელმწიფო დაწესებულებასთან - სახელმწიფო უსაფრთხოების სამსახურთან და სასაზღვრო პოლიციასთან - და საქართველოს ტერიტორიაზე ადამიანებით უკანონო ვაჭრობის ორგანიზებას: ქრთამის სანაცვლოდ 2000 ადამიანის უკანონო შემოტანას. 2000 დოლარის ქრთამის აღებაში დამადანაშაულეს. ჯამში - ოთხი მილიონი დოლარის მიღებაში. სიუჟეტში ნათქვამია, რომ მე წინასწარი შეთქმულებით და სახელმწიფო უსაფრთხოების სამსახურთან შეთანხმებით ჩავიდინე მძიმე დანაშაული. ჩემთვის ეს სახელმწიფო ღალატის ტოლფასია. ქვეყნის ღალატია, როცა პოტენციური კრიმინალები უკანონოდ შეჰყავთ სახელმწიფოს ტერიტორიაზე ქრთამის სანაცვლოდ. ამიტომ, სარჩელის შეტანის გარდა, ვუკავშირდები პროკურატურას და ვითხოვ გამოძიებას, რათა დადგინდეს ვინ არის დამნაშავე - მე, სახელმწიფო უსაფრთხოების სამსახური, სასაზღვრო პოლიცია თუ შპს „ტყუილის ფორმულა“. ყოველ შემთხვევაში, საუბარია მძიმე დანაშაულზე. კონსულტაცია გავმართე ადვოკატებთან და მაქსიმუმი, რაც სასამართლომ სარჩელის შედეგად შეიძლება გამოიტანოს, არის „ტყუილის ფორმულას“ საჯარო ბოდიშის მოხდის ვალდებულება. გარდა ამისა, შესაძლოა დაჯარიმდნენ 10 000 ლარის ოდენობით. ეს სრულიად არაპროპორციულია მათ მიერ ჩადენილ დანაშაულთან. როდესაც ადამიანს საჯაროდ ადანაშაულებენ ასეთ მძიმე დანაშაულში, პასუხისმგებლობა უნდა იყოს პროპორციული. გადაცემის სადღაც 35-ე წუთზე გაჟღერებული ბოდიში, რომელიც შესაძლოა ათმა ადამიანმა რეალურად ვერ გაიგოს, არანაირად არ შეესაბამება ცილისწამებას, რომელიც ჩაიდინა "ტყუილის ფორმულამ". მიმაჩნია, რომ ფორმულას მიერ გაკეთებული განცხადებებიც კი საკმარისი იყო პროკურატურისთვის გამოძიების დასაწყებად. როცა საქართველოს სახელმწიფო უსაფრთხოების სამსახურს საჯაროდ ადანაშაულებენ კრიმინალურ ქმედებებში მონაწილეობაში, მინიმუმ სასაზღვრო პოლიციაც უნდა გამოცხადდეს, რადგან სხვაგვარად წარმოდგენა უბრალოდ შეუძლებელია. როგორ შეიძლებოდა ქვეყანაში 2000 უკანონო შესვლა, თუ ამის შესახებ არცერთმა სამთავრობო სამსახურმა არ იცოდა? ძნელი წარმოსადგენია. ამიტომ მოვითხოვ, პროკურატურამ დაიწყოს გამოძიება, ასევე ჩატარდეს შემოწმება სახელმწიფო უსაფრთხოების სამსახურში და შსს-ში იმის დასადგენად, იყო თუ არა მსგავსი ფაქტები და ვინ იყო ჩართული მძიმე დანაშაულში. მეორე, არანაკლებ მნიშვნელოვანი გარემოებაა, ვინ დგას ამ დანაშაულის უკან. ამ დანაშაულის შემკვეთი, დამფინანსებელი და ორგანიზატორი ქვეყნიდან გაქცეული და ძებნაში მყოფი კრიმინალი, საქართველოს თავდაცვის ყოფილი მინისტრი დავით კეზერაშვილია. ყველა თანამშრომელი არის ამ დაწესებულების მიერ ჩადენილი დანაშაულის თანამონაწილე, რომელსაც ტელემაუწყებელს ვერ ვუწოდებ“, - განაცხადა გოგა ხაინდრავამ.
• ქართული ოცნების დეპუტატმა ევროპარლამენტის რეზოლუციები გააკრიტიკა • საქართველოს საკითხზე დღეს ევროპარლამენტში დებატები გაიმართება • 2025 წელს საქართველოში პირდაპირი უცხოური ინვესტიციების მოცულობა 7.6%-ით გაიზარდა. • ლილოს მუნიციპალურ თავშესაფარში 116 მიუსაფარი ცხოვრობს • რომან გოცირიძე: დღევანდელ გეოპოლიტიკურ ვითარებაში არავინ დაუწესებს აზერბაიჯანს და ასე გადაარჩინა „ყულევი“ • ეუთოს საპარლამენტო ასამბლეის დელეგაციამ მოითხოვა ნებართვა პოლიტიკური საქმიანობისთვის პატიმრების მონახულების შესახებ •