კობახიძემ დაუშვა ეთნიკურად ქართველებისთვის მოქალაქეობის მიღების გამარტივება

„ქართული ოცნების“ მთავრობა ეთნიკურად ქართველებზე მოქალაქეობის მინიჭების გამარტივებას განიხილავს. ამის შესახებ პრემიერ-მინისტრმა ირაკლი კობახიძემ ტელეკომპანია „იმედის“ ეთერში, მიგრაციის თემაზე და ქვეყნის მოსახლეობაზე საუბრისას განაცხადა. კობახიძის თქმით, თუ „მშობლები საქართველოს მოქალაქეები არიან, მაშინ ბავშვს მოქალაქეობის მიღების კუთხით არანაირი პრობლემა არ აქვს“; თუ ისინი არ არიან საქართველოს მოქალაქეები, ამ შემთხვევაში მათი ოჯახის წევრმა, მათ შორის ბავშვმა, უნდა მიიღოს მოქალაქეობა ნატურალიზაციის გზით. „პროცედურების გამარტივება ამ კუთხითაც არის შესაძლებელი. ჩვენ განვიხილეთ იუსტიციის მინისტრთან და ვგეგმავთ პროცედურების გამარტივებას“, - განაცხადა კობახიძემ დეტალების დაკონკრეტების გარეშე. „სხვადასხვა ქვეყანაში, მათ შორის მეზობელში, არიან, მაგალითად, ეთნიკური ქართველები, რომლებსაც მოქალაქეობა არ აქვთ, მათი შვილები არიან, თავად სურთ მოქალაქეობის მიღება და მათ შორის არიან ადამიანები, რომლებმაც არ იციან ქართული ენა - და მათთვისაც შეიძლება პროცედურების გამარტივება. ამ საკითხზე აქტიური კონსულტაციები გვაქვს და ალბათ მივიღებთ გადაწყვეტილებას“, - დასძინა მან. კობახიძემ არ გამორიცხა კონსულტაციები იმ ქართველებისთვის მოქალაქეობის მინიჭების საკითხზე, რომლებიც „ერთ დროს გამოასახლეს ან სხვაგვარად აღმოჩნდნენ სხვა სახელმწიფოს ტერიტორიაზე, მათ შორის საუკუნეების წინ“. „როგორც წესი, ისინი არ არიან საქართველოს მოქალაქეები. მათ შორის არის მილიონობით ქართველი, ეთნიკური ქართველი, მეზობელ თურქეთში, ირანში - ფერეიდანელი ქართველები, სხვა ქვეყნებში - ადამიანები, რომლებიც ერთ დროს საქართველოდან წავიდნენ. ეს უფრო ფართო განხილვის საგანია“, - განაცხადა მან. „ქართველების საქართველოში დაბრუნებაზე“ საუბრისას კობახიძემ მოიყვანა სტატისტიკა, რომლის მიხედვითაც, უკრაინაში ომის დაწყების შემდეგ ქვეყანაში 40 ათასი ქართველი ჩამოვიდა, რომელთათვისაც „არავითარი დაბრკოლება არ შექმნილა“. „2022 წლიდან საქართველოში 40 000 ქართველი დაბრუნდა, ძირითადად რუსეთიდან, უკრაინიდან და სხვა პოსტსაბჭოთა ქვეყნებიდან. საქართველოში დღემდე 40 000 ქართველი ცხოვრობს, რომლებიც სამშობლოში 2022 წლის შემდეგ დაბრუნდნენ“, - აღნიშნა კობახიძემ. პოლიტიკოსმა ასევე განაცხადა, რომ „პრობლემური იდეოლოგია“ უარყოფითად აისახება ქვეყანაში ქორწინებისა და შობადობის სტატისტიკაზე. ეთნიკურად ქართველებზე მოქალაქეობის მინიჭების აუცილებლობაზე მეხუთე პრეზიდენტმა სალომე ზურაბიშვილმაც ისაუბრა. ამასთან, მან მკვეთრად გააკრიტიკა „ქართული ოცნების“ გადაწყვეტილება დიასპორას ხმის უფლების ჩამორთმევის შესახებ.

• EN • DE • KA •