პროკურატურის განცხადება ქიმიურმა ექსპერტიზამ დაადასტურა, რომ ალეკო ელისაშვილის მიერ სასამართლო დარბაზში შესვლის შემდეგ ჩამოსხმული ნივთიერება ძალზე აალ...
ტერორისტული აქტის მცდელობის ბრალდებით დაკავებული „ლელო-ძლიერი საქართველოს“ ერთ-ერთი ლიდერის, პოლიტიკოს ალეკო ელისაშვილისთვის პროკურატურამ წინასწარი პატიმრობა მოითხოვა. პროკურორმა მარიამ ბერძენიშვილმა განაცხადა, რომ ელისაშვილი წინასწარ შემუშავებული გეგმის მიხედვით მოქმედებდა. პროკურორის თქმით, არსებობს რისკი იმისა, რომ ელისაშვილმა შეიძლება ჩაიდინოს ახალი დანაშაული, მოახდინოს გავლენა მოწმეებზე ან შეეცადოს მართლმსაჯულებას თავი აარიდოს. ბერძენიშვილმა ასევე განაცხადა, რომ ელისაშვილის მიზანი მოქალაქეების დაშინება იყო. "კანონი მისთვის არ არის დაბრკოლება, მან სცადა ცეცხლის წაკიდება ამ სიტყვის სრული გაგებით. სასამართლოს უკანა ეზოდან წინასწარ შემუშავებული გეგმით შევიდა", - განაცხადა ბერძენიშვილმა. მისივე თქმით, ქიმიური ანალიზით დადასტურდა, რომ ელისაშვილის მიერ გამოყენებული ნივთიერება ძალზე აალებადია. პროკურორმა თქვა, რომ მან ცეცხლსასროლი იარაღის გამოყენება სცადა და სასამართლო მარშალებს დაემუქრა, რაზეც ელისაშვილმა უპასუხა: „ეს სიცრუეა“. ამასთან, პროკურორმა ხაზგასმით აღნიშნა, რომ ეჭვმიტანილმა შესაძლოა სხვა დანაშაული ჩაიდინოს. ბერძენიშვილმა აღნიშნა, რომ ტელევიზიით ელისაშვილი იმედგაცრუებული ჩანდა, რომ გეგმის დასრულებამდე სულ რამდენიმე წამი რჩებოდა, რაც მის მოტივაციას ადასტურებს. პროკურორმა ხაზგასმით აღნიშნა, რომ ელისაშვილი უკვე ჩართულია ძალადობრივ ქმედებებში და წაუყენეს შესაბამისი ბრალი, რაც ქმნის მოწმეებზე ზემოქმედების რეალურ რისკს. დაცვის მხარე არ ეთანხმება ბრალდების მხარის მოთხოვნას. ადვოკატმა გიორგი რეხვიაშვილმა განაცხადა, რომ ტერორიზმის ბრალდება არაპროპორციულია. რეხვიაშვილმა ასევე განაცხადა, რომ ელისაშვილი საზოგადოების დაშინებას არ ისახავდა მიზნად; პირიქით, შეგნებულად აირჩია შაბათი და არასამუშაო საათები, რათა ხალხისთვის ზიანი არ მიეყენებინა. ადვოკატმა ელისაშვილისთვის 5000 ლარის გირაო ითხოვა. ცნობისთვის, ალეკო ელისაშვილს ბრალი სსკ-ის 19-323-ე მუხლის 1-ლი ნაწილით ედება, რაც ტერორისტული აქტის ჩადენის მცდელობას ეხება. ამ დანაშაულისთვის სასჯელი 10-დან 15 წლამდე თავისუფლების აღკვეთას ითვალისწინებს. გამოძიების ინფორმაციით, ნიღბიანი ელისაშვილი 29 ნოემბერს, დაახლოებით 04:00 საათზე, ცეცხლსასროლი იარაღით, საბრძოლო მასალებით და ტერორისტული აქტის ჩასადენად საჭირო ნივთებით შეიარაღებული მივიდა თბილისის საქალაქო სასამართლოს შენობაში, ჩაქუჩით ჩაამსხვრია სასამართლოს ოფისის გარე მინა და შიდა შენობაში შევიდა. ბრალდების მხარის ცნობით, მან შემთხვევის ადგილზე არსებულ ნივთებსა და დოკუმენტებს დიდი ოდენობით აალებადი სითხე დაასხა და ცეცხლის წაკიდება სცადა. გამოძიება ასევე აღნიშნავს, რომ პოლიტიკოსი სასამართლოს ერთ-ერთ მარშალს თავს დაესხა და სცემა.
• გარეგინ II: მძიმე ჟამს ილია მეორე მამობრივი სიბრძნითა და სიყვარულით წინამძღოლობდა სამწყსოს და მტკიცედ იცავდა საქართველოს ეკლესიის მისიას. • Freedom House - საქართველოს რეიტინგი 2025 წელს 4 პუნქტით დაეცა, რაც ყველაზე დიდი ვარდნაა ევრაზიის რეგიონში. • ნაჩო სანჩეს ამორი - ივანიშვილმა გადაწყვიტა: მე არ მინდა ვიყო დასავლეთის ნაწილი, მირჩევნია რუსეთთან დარჩენა ჩემი ბიზნეს ინტერესებისთვის - ევროკავშირი არაფერს აკეთებს საქართველოსთან მიმართებაში - ჩვენ უნდა ვიმოქმედოთ • სააკაშვილი: გთხოვთ წამიყვანოთ პატრიარქის დაკრძალვაზე, როგორც მისი მეგობარი, საქართველოს მესამე პრეზიდენტი • სასჯელაღსრულების სამსახური: მიხეილ სააკაშვილის მოთხოვნა „არ შეესაბამება კოდექსით გათვალისწინებულ ნორმას“ • პატრიარქის ნათლულები ილია მეორის ხსოვნისადმი მიძღვნილ მსვლელობას მართავენ •